Stichting Jeugdwerk Jong Bonaire ta un sentro pa desaroyo propio i aktividat despues di ora di skol pa hóben i adulto hóben. Esaki ta posibel danki na supsidio, donashon i buskamentu di fondo. Nos oferta ta konsistí di aktividat deportivo, rekreativo, edukativo i kultural ku ta kontribuí na kresementu personal i desaroyo di talento di nos hóbennan. Nos ta hasi esaki ku un tim entusiasmá i bon prepará di guia di aktividat i algun empleado ku ta sosténé e trabou. Klek aki pa un resúmen di nos aktividatnan.
Na Jong Bonaire nos ta guia hóben di 12 te ku 27 aña den nan desaroyo. Nos ta guia nan pa asina nan por bira adulto ku ta pará firme den nan sapatu i den futuro ta siudadano responsabel i komprometé. Jong Bonaire t’ei pa tur hóben. Pa nos nan desendensia, klase sosial, nan koló, idioma materno òf kultura no ta importá. Kada hóben ta haña mesun chèns serka nos pa desaroyá su mes.
Mishon i enfoke di Jong Bonaire
Nos trabou ku hóben ta basá riba tres pilá importante: Rèspèt, Disiplina i Desaroyo propio. Tur aktividat i programa ta basá riba esakinan. Pa logra nos metanan, nos ta enfoká riba:
1.
Desaroyo di talento:
Ta stimulá i motivá hóben pa deskubrí nan talento i interes i pa desaroyá esakinan mas aleu. Asina nos ta pone e base pa nan éksito den futuro.
2.
Siña balor importante:
Nos ta siña hóben pa tin konfiansa den nan mes, pa karga responsabilidat, pa ta íntegro, pa traha huntu i respetá otro.
3.
Un oferta amplio:
Jong Bonaire tin un variedat amplio di programa i aktividat riba tereno di rekreashon, edukashon, kultura, kreatividat, muzik i deporte.
Grupo meta
Jong Bonaire ta dirigí su mes prinsipalmente riba hóben di 12 te ku 27 aña di enseñansa sekundario i mbo.
Riba djabièrnè, durante fakansi di Pasku di Resurekshon i durante fakansi grandi, ta organisá aktividat tambe pa alumno di grupo 7 i grupo 8 di skol básiko.
Orario
Jong Bonaire ta habrí di djaluna te ku djabièrnè entre 12:30 or i 18:00 or pa hóben te ku 18 aña. Riba djamars i djaweps anochi tambe tin aktividat. E ora ei hóben mas grandi / adulto hóben tambe ta bon biní.
Hóben ku ta miembro di Jong Bonaire por bishitá nos sentro 5 dia pa siman i partisipá na tur nos aktividatnan.
Kiko mas Jong Bonaire ta hasi
Jong Bonaire ta organisá aktividat edukativo, rekreativo i deportivo tambe pa komunidat, manera ‘Fun walk’ i ‘Swim to Klein Bonaire’.
Ora nos sentro no ta den uzo pa nos mes aktividatnan, ta hür e espasionan ku skol, instansha, klup i empresa. Riba e página ‘Rent a space / Hür un espasio’ ta menshoná kondishon pa hür nos espasionan.
Kualke dia den siman na Jong Bonaire
Di djaluna te ku djabièrnè hóben ta bon biní di 12:00 or te 8:00 or, e día ta partí por ehèmpel di e forma akí:
For di 12:30 or
Yegada i lùnch
E hóbennan ta bin serka nos despues di skol. Jong Bonaire ta sòru tur dia pa un lùnch saludabel i dushi ku ta grátis. Atardi kantina ta bende snèk i kos di bebe tambe.
14:00 or – 15:00 or
Tempu liber
E hóennan mes ta disidí kiko nan ta hasi: sosegá un ratu, traha hùiswèrk, hunga wega òf praktiká deporte. Nan tin e oportunidat tambe pa papia ku un mèntòr/coach.
15:00 or – 16:00 or
Tempu pa hùiswèrk òf Bida Master
Den e ora akí e hóbennan por traha hùiswèrk òf partisipá na Bida Master. Bida Master ta un tayer kaminda e hóbennan ta papia ku guia tokante tema ku ta interesante, delikado òf ta útil pa siña algu di dje.
16:00 or – 17:30 or
Tempu pa un aktividat di nan eskoho
E hóbennan mes por skohe un aktividat di e oferta di Jong Bonaire.
17:30 or – 18:00 or
Rùim òp i klousura di dia
For di 17:30 or mayornan ta bin buska e hóbennan, òf nan ta bai kas ku baiskel òf na pia. E bùs di Jong Bonaire por laga nan tambe den serkania di nan kas.
Mèntòr/coach pa hóben
Tur hóben tin nan mes mèntòr. Nan ta papia ku e mentor kon ta ku nan. Si kos no ta bai bon ku un hóben, òf si un hóben no ta sinti su mes bon òf e mentor ta preokupá p’e hó ben, nan ta papia esaki ku otro. E mèntòr por tuma kontakto ku e mayor(nan), skol òf un instansha na e isla. Esaki ta sosodé semper den konsulta ku e hóben mes.
Jong Bonaire tin regla di kas. E reglanan t’ei pa tur hóben pasa bon i pa nan sinti nan mes seif na Jong Bonaire. Un regla importante ta ku no ta tolerá bullying òf bringamentu. Tur guia/mèntòr tin formashon pa yuda hóben i sostené nan den nan desaroyo. Tur guia ta papia papiamentu, hulandes i ingles. Algun guia ta papia spañó tambe. E idea ta pa guia i sostené e hóbennan mas tantu posibel den nan idioma materno.
Koperashon ku organisashon lokal
Nos ta traha estrechamente huntu ku organisashon lokal importante manera: Jeugd en Gezin, Voogdijraad, Jeugdzorg Caribisch Nederland, Mental Health Caribbean i skol lokal (SGB i RK Schoolbestuur), Fundashon Forma, Stichting Forsa, Direktorado Komunidat i Kuido di OLB, GGD, Akseso i EOZ.
Traha na Jong Bonaire
Bo tambe ke traha na Jong Bonaire? Tira un bista den nos resúmen di vakatura.